Birtum atburðaskrána!

Er ekki ástæða til þess í dag að gera atburðaskrá (e. log file) líðandi stundar aðgengilega almenningi? Þetta er alþekkt fyrirbrigði úr upplýsingatækni þar sem hver aðgerð er skráð í atburðaskrá þannig að hægt sé að rekja hluti til baka, gerist þess þörf. Þannig er hægt að rekja hvaða aðgerðir t.d. leiddu til kerfishruns eða villu í kerfinu.

Jón Steinsson, hagfræðingur við Columbia-háskóla í New York, hefur lýst því yfir að hann hafi þungar áhyggjur af því að nú verði gerð axarsköft þegar misvitrir menn véli um hluti sem þeir þekkja ekki. Þetta þarf að fyrirbyggja með öllum ráðum og gagnsæi er besta leiðin til þess. Skv. greiningu Jóns skiptir hvert prósent í lækkun á verðmæti bankanna okkur verulegu máli því í dag er það metið á 30 milljarða króna. Þannig leggjast tvö prósent sig út á 60 milljarða o.s.frv. Eins og einhver sagði, "milljarður hér og milljarður þar, brátt verða þeir að alvöru fjárhæðum!"

Fundargerðir, minnispunktar og annað sem tengist störfum ákveðinna manna ætti að standa öllum til boða á Netinu. Þar gætu áhugasamir litið á þessi gögn og rýnt í þau til að sannreyna að allt sé með felldu. Vera má að það þurfi ákveðna leynd yfir samningaviðræðum, en niðurstöður þeirra ættu alltaf að vera háðar ákveðnum fyrirvörum og einn þessara fyrirvara ætti að vera opinber birting niðurstaðnanna og allra tengdra gagna.

Þetta er auðvelt í innleiðingu og einfalt í framkvæmd. Og það sem meira er, þetta er nauðsynlegt til þess að fyrirbyggja að mál séu til lykta leidd í bakherbergjum, reykfylltum eða ekki. Nú er verið að ráða ráðum um framtíð þjóðarinnar og flestir þeirra sem að því koma voru leikmenn í þeim leikjum sem leiddu til hrunsins hjá okkur eða gerðu afleiðingar hrunsins alvarlegri en ella. Það er því alveg sjálfsagt að þjóðin geti litið yfir öxlina á þeim.

Ef þessir menn hafa ekkert að fela, er þetta þá ekki sjálfsagt mál?

Athugasemdir

[Theódór Norðkvist, 7.12.2008 kl. 21:35]

Sammála þessu. Hér er reyndar ágætis atburðaskrá síðustu mánuði, rataði meira að segja á bloggið hjá Agli.

[Óli Jón, 8.12.2008 kl. 16:04]

Ég vek athygli á frétt á visir.is sem hefur yfirskriftina Engir minnismiðar til um Icesavefundi og samtöl. Hún kemur beint inn á þessa beiðni mína um gagnsæi í þessu ferli öllu saman.