Hundrað milljónum vel varið, ó já!

Rétt í þessu heyrði ég, í fréttum Stöðvar 2, að það kostar okkur 100 milljónir króna að fá þessa flugsveit til þess að verja okkur, í sex vikur, fyrir þeim sífelldu árásum sem við verðum daglangt fyrir. Ég var einmitt svo hræddur um að nú næðu óvildarmenn Íslands að ráðast á okkur án fyrirstöðu, en þeir verða altént að slá þeim áformum sínum á frest í sex vikur! Frábært!!! Rosalega er ég feginn, og þó. Innrásarliðið kemur þá upp úr miðjum júní, sem er auðvitað pirrandi því þá ætlaði ég að ganga sem aldrei fyrr. Það verður auðvitað frekar ömurlegt og geggt glatað að verða fyrir innrás í júní. Mín fyrrverandi á líka afmæli þá og ég óska henni ekki þess að halda upp á þann ágæta viðburð undir járnhamri innrásarliðs. Kannski verður þetta ömurlega leiðinlegt innrásarlið sem tekur ekkert tillit til fólks sem vill ganga eða halda upp á afmælið sitt! Væri það ekki enn meira glatað?

Því spyr ég, getum við ekki bara borgað 300-400 milljónir í viðbót (hálfur milljarður er reyndar svolítið flott tala) og verið þannig örugg gegn innrás í allt sumar? Ég held að verðbólgupínd alþýðan kynni nú að meta slíkt úr hendi ríkisstjórnarinnar. Það er svo fúlt að vera hernuminn að sumri til, en ekki svo mikið um haust. Hvað þá vetur! Það er bara fínt að vera hernuminn að vetri til, maður gerir hvort eð er ekki neitt. En ekki að sumarlagi!

Plís!!! Ekki láta gera innrás í sumar!!! Það er svo ömurlegt!!! Fáum Frakkana til að vera lengur!!! Gera menn sér enga grein fyrir því hvað íslenska sumarið er stutt og sjaldgæft? Við hættum bara að verða veik á meðan, þá er hægt að taka þennan hálfa milljarð af framlagi til heilbrigðismála. Svo má líka taka fjórar milljónirnar sem ríkisstjórnin setti í baráttuna gegn verðbólgunni. Þær myndu kaupa þjónustu Frakkana í 1,7 daga! Við værum örugg þá! Það væri fínt að fá flugsveitina yfir helgi til að verja okkur.

Svo eru þoturnar líka svo flottar! Grrrrrrrrrrrrrrr!!!

Sjónarspil í háloftunum

Athugasemdir

[RE 5.5.2008 kl. 22:48]

haha, skemmtilegt blogg

[Theódór Norðkvist, 5.5.2008 kl. 23:06]

Betra að verja þessum 100 milljónum í þetta en einkaþotur undir afturendann á óhæfum stjórnmálamönnum, til að þeir geti leikið sér úti í heimi og flúið vandamálin hér heima.

[jensen 5.5.2008 kl. 23:19]

Utanríkisráðherran,Ingibjörg Sólrún virðist vera á sjóðandi túr--hún túrar um allan heim og er í því að finna einhverja til að verja okkur.  Kæmi ekki á óvart að þeir næstu sem koma á eftir Frökkunum verði her Barbados eyja.Hún er allstaðar að reyna að væla okkur inn í Öryggisráð Sameinuðu Þjóðana.Skiptum um stjórn.

[Svanur Sigurbjörnsson, 6.5.2008 kl. 00:32]

Akkúrút það sem ég var að hugsa um þetta.  Hvað höfum við með orystuþotur að gera?  Það má færa rök fyrir því að gott radareftirlit þjóni tilgangi en á nokkur von á stríði?  Á einhver von á því að heræfingar Rússa séu í þeim tilgangi að yfirtaka Ísland?  Þetta er hreint sorglegt og alger óvirðing fyrir fólki í efnahagsvanda í landinu eða fjársveltu heilbrigðiskerfi.

[Valli 6.5.2008 kl. 03:46]

Sjaldan sem ég fæ brainfreeze en þessi kaldhæðni var bara of mikil...

[Sigurður Þórðarson, 6.5.2008 kl. 17:43]

Þetta er eitthvað rugl frá þeim tíma þegar Davíð beit í sig að það yrði að halda í herþotur til að halda í umsvifin á Keflavíkurvelli. Það væri nær að nota þessa peninga í Landhelgisgæsluna þar sem þeir kæmu í góðar þarfir.

[Mofi, 12.5.2008 kl. 23:47]

Frábærlega vel framsett grein!  Hvað er þetta lið að pæla???