Guðleg Smugumið Gídeonistanna í Hafnarfirði

Þetta er þægileg leið fyrir Gídeonista til þess að dreifa kverinu sínu og nauðsynlegt fyrir þá til þess að réttlæta tilveru sína. Það er nefnilega ólíkt betra fyrir þá að geta sagt að þeir hafi náð að dreifa kverinu til allra skólabarna í ákveðnum skólum í stað þess að 1% skólabarna, eða réttara sagt foreldrar þeirra, hafi lagt sig eftir að ná í það.

Reyndar er kjánalegt að skilgreina Nýja testamentið sem fræðsluefni og þarna er farið þægilega í kringum þetta vandræðalega mál, en líklega helgar Guðslegur tilgangurinn þetta súra meðal. Þetta kver er innsti kjarninn í boðun kristinna og þeir ættu í raun, ef það er einhver döngun í þeim, að vera hundfúlir yfir þessari niðurfærslu úr boðunarbók niður í fræðsluefni. En þeir hafa bersýnilega ekki metnað í meira og láta sér þetta því að góðu verða. Að skilgreina Nýja testamentið sem fræðsluefni og setja það þannig í sama flokk og t.d. bók um fluguveiðar er augsýnilega ásættanlegt á meðan það opnar leið að nýjum og óplægðum ökrum í trúboðinu.

Í Hafnarfirði velja þeir auðveldustu leiðina, rétt eins og Jesús Jósepsson lagði fyrir. Reyndar kemur ekki fram í greininni að Gídeonistarnir ætli að nýta sér þessi Smugumið, en mig grunar að þeir stökkvi í þau, óðfúsir, enda eru gjöfulustu fiskimiðin fyrir hausaveiðara Drottins að finna í yngstu bekkjum skólakerfisins.

Gídeon dreifi áfram í Hafnarfirði

Athugasemdir

[DoctorE 12.6.2012 kl. 11:13]

Mér finnst líklegt að flestir foreldrar sjái að það er ekki gott fyrir börnin að hleypa trúarnöttum að þeim...
Við höfum séð það á síðustu árum að hvergi er sorinn meiri en einmitt hjá meintum umboðsmönnum Gudda...

[Trúleysingi 16.6.2012 kl. 00:50]

Sæll. Hér er einn fremsti vísindamaður heims, og helsti talsmaður trúleysingja í dag. Hann segir réttilega að sá maður sem ekki hefur lesið King James Biblíuna, hefur einfaldlega engan aðgang að enskumælandi menningu, hann er með öðrum orðum menningarlaus/plebbi, ólæs á myndmál, táknmál, bókmenntir og fleira, því hann vantar þann lykil sem Biblían er. Hér geturðu séð viðtal við hann og afhverju hann, einn helsti hatursmaður trúarbragða, tók þátt í verkefni sem snerist einmitt, líkt og Gídón manna, um að breiða út Biblíulæsi meðal almennings. Í reynd er Biblían einn af nauðsynlegum lyklum af skilningi á mannkynssögunni, vestrænum bókmenntum og listasögu og svo framvegis, og bara öllum víðtækum menningarlegum skilningi. Maður sem ekki hefur lesið Biblíuna er einfaldlega illa lesinn og fáfróður. En látum Richard Dawkins um að útskíra þetta: http://www.youtube.com/watch?v=EJtCqjUUHG0

Allir góðir foreldrar lesa heimsbókmenntirnar fyrir börnin sína og fanga því að þau eignist lykilrit heimsbókmenntanna. Þau vilja ekki börnin þeirra verði valdalausir utangarðs plebbar, fáfróð um allt nema það sem fjölmiðlar mata þau á. Lélegir foreldrar fanga aftur á móti bókabrennum.

Í dag í reykvísku skólakerfi er börnum skylt að læra UM Biblíuna, það er að segja hvað eitthvað skólakver, einhverjir aðrir menn segja um hana........en þeim er meinað að eignast hana sjálf og þau lött frá því að lesa hana með því að láta líta svo út sem þeir sem vilji gefa þeim hana séu eins konar glæpamenn og mannréttindabrotar.

Á miðöldum var hver sá brenndur á báli, hýddur, strýktur og tekinn af lífi af rannsóknarréttinum sem vildi dreifa Biblíunni til almennings (en þýðing hennar á móðurmál fjöldans markaði upphaf evrópskrar millistéttar, og þar með upplýsingarinnar og nútímans, mannréttinda og frelsis og svo framvegis). Almenningi var einungis leyft að lesa það sem páfinn og senditíkur hans sögðu um Biblíuna og þeir voru útmálaðir sem villutrúarmenn og djöfladýrkendur sem vildu dreifa ritinu til almennings (en í reynd var almenningi haldið frá því að læra að lesa meðal annars til að tryggja ofurvald páfans.)

Í dag eru reykvísk skólabörn, á tímum þar sem læsi fer hríðversnandi á Íslandi og er það versta á þessari öld, og sífellt fleiri drengir sérstaklega greinast í raun ólæsir í mikilvægari skilningi þess orðs(þeir geta lesið stafina já, en þeir geta ekki skilið inntak texta í raun), og fleiri og fleiri börn og unglingar játa að lesa einfaldlega ekki neitt, þá sitja reykvísk skólabörn við sama borð og kotbændur á miðöldum sem máttu lesa það sem aðrir sögðu um þessa bók, en ekki það sem bókin sjálf segir, og mynda sér síðan sjálf skoðanir á því.

Hafnarfjörður er að fara rétt leið. Hvert mannsbarn ætti að lesa Biblíuna, og líka Gitu, Kóraninn, ræður Búddha og svo framvegis, lesa síðan um málið frá ýmsum hliðum og mynda sér sjálft skoðanir á þessum málum, því kynni af heimsbókmenntum hvort sem þau gera menn trúaða á eitthvað ákveðið eða ekki, efla skilning á mannkyninu og sögu þess, mannsandanum og hafa göfgandi áhrif og gera menn kúltíveraða.

Það gera bókabrennur ofstækissinna ekki.

Gídeón vinnur gott starf og sérstaklega gagnvart ókristnum innflytjendabörnum, sem er mikilvægara en allir aðrir að skilji menninguna sem þau búa í, hafi nauðsynlega lykla að henni, annars eru þau sem blind og heyrnarlaus og fara hér halloka. Að sama skapi ættu börn sjálf að lesa bækur annarra trúarbragða, svo og rit manna eins og Richard Dawkins og annarra trúleysingja (en það getur hvert meðalgreint 12 ára barn ráðið við slíkar bækur)

Það sem ætti að banna með lögum er heilaþvottur, innrætting og að matreiða börnin á skoðunum en hindra þá sem vilja að þau lesi sjálf og myndi sér þær sjálf.

Þeir eru óvinir lýðræðis, frelsis og menningar og vilja hneppa okkur aftur í fasískan þrældóm í miðaldastíl hins ófrjálsa og heilaþvegna hugar.

[Trúleysingi 16.6.2012 kl. 00:58]

Að lokum bendi ég þeim vinsamlegast á það sem í hjarta sínu hrópa eftir bókabrennum og takmörkuð aðgangi almennings að hvaða bók sem er, að þeim myndi líða mun betur í Norður Kóreu, nú eða fjölmörgum löndum eins og Saudi Arabíu, þar sem Biblían er einmitt bönnuð ásamt reyndar velflestum lykilritum vestrænnar menningar, og legg ég til að þeir finni sál sinni frið með að flytja einfaldlega til þessara landa, því þeir eiga ekki heima hér, meðal frjálsra manna sem börðust hart fyrir réttindum sínum, en sú barátta byrjaði einmitt með aðgangi fólks að einmitt þessari bók, sem allir menntaðir menn skilja hvers virði er, og að virði hennar kemur trú manna ekkert við.

[Óli Jón, 17.6.2012 kl. 00:01]

Trúleysingi: Ef taka á mark á rökum um menningarlæsi, þá þyrfti að dreifa svo ótal mörgu öðru í grunnskólum með Nýja testamentinu til þess að tryggja að börnin fái fullan skilning á samfélagi sínu. Við getum talað um bíómyndir sem eru óþrjótandi uppsprettur af hvers konar myndmáli, líkingamáli og hverju öðru því sem auðgar líf okkar og gefur því merkingu. Við getum einnig týnt til tölvuleiki, tónlistarmyndbönd, LOL ketti á Netinu o.s.frv. Það eru m.a.s. til aðrar markverðar bækur til viðbótar við Nýja testamentið sem eiga sama erindi við ungviðið. Ekkert af þessu verður borið í grunlausa hafnfirska æsku. Nýja testamentið, sem er málgagn kristinnar kirkju, á að sama skapi ekkert erindi í leik- og grunnskóla.

Þú segir:

Í dag í reykvísku skólakerfi er börnum skylt að læra UM Biblíuna, það er að segja hvað eitthvað skólakver, einhverjir aðrir menn segja um hana........en þeim er meinað að eignast hana sjálf og þau lött frá því að lesa hana með því að láta líta svo út sem þeir sem vilji gefa þeim hana séu eins konar glæpamenn og mannréttindabrotar.

Þú hlýtur að sjá að þessi staðhæfing þín um að krakkagreyjunum sé meinað að eignast Biblíuna er hálf kjánaleg, nei, hún er fullkomlega kjánaleg! Auðvitað er enginn sem bannar krakkagreyjunum að eignast Biblíuna! Ef krakkarnir vilja ekki borga fyrir kverið, en það fæst víða í bókaverslunum, þá geta þau gerst sér ferð til Gídeonistanna og sníkt það hjá þeim. Þá spara þau Gídeonistunum ferðina, sem er væntanlega bónus fyrir þreytta þræla Drottins. Það sem Gídeonistar vita hins vegar mæta vel er að fá börn muni leggja leið sína til þess að heimta af þeim Nýja testamentið sitt :) það er hreinlega engin eftirspurn eftir því í aldurshópnum 6-15 ára! Þess vegna þurfa þeir að dreifa kverinu í skólunum til þess að finna tilveru sinni einhverja réttlætingu! Þeir geta jú ekki verið dátar Drottins, krossmenn hins hæsta, ef þeir vinna ekki á sitt band sálir leik- og grunnskólabarna í hans nafni.

Þú segir einnig:

Það sem ætti að banna með lögum er heilaþvottur, innrætting og að matreiða börnin á skoðunum en hindra þá sem vilja að þau lesi sjálf og myndi sér þær sjálf.

Það er enginn að mæla með því að hindranir verði settar í veg barna í leit þeirra að fróðleik og þekkingu. Aðeins er verið að tala um að hindra það að fulltrúar einnar trúar í hafsjó af margvíslegum trúarbrögðum geti farið með varning sinn í skólana og dreift honum þar. Skv. þínum eigin orðum ættir þú að taka hvað mest undir það að Gídeonistum sé meinað að koma með áróður sinn inn í skólana því þeir eru tannhjól í innrætarapparati kristninnar sem matreiðir skoðanir sínar ofan í krakkagrey sem ekki hafa nokkrar forsendur til þess að meta sjálf sannleiksgildi þess sem þar er borið á borð. Þú ert því þversaga í máli þínu svo ekki sé meira sagt.

Athugaðu svo að Gídeonistarnir sækja það ekki stíft (lesist: þeir sækja það alls ekkert!) að fá að dreifa kverinu sínu í framhaldsskólum og háskólum. Getur það verið vegna þess að þar finna þeir fyrir einstaklinga sem geta rökrætt við þá um þann varning sem þeir falbjóða? Þar eiga þeir ekki við smábörn sem gert er að taka mark á öllu sem gerist í skólanum, líka köllunum sem koma með bláu bókina. Nei, það eru aumir veiðimenn sem beina spjótum sínum að veikustu bráðinni, börnum sem hafa ekki meira vit en svo að þau ráða ekki sínum eigin útivistartíma!

Hvað varðar Biblíunar sem einhvern lykil að vestrænni menningu, þá gef ég tvö píp fyrir það og skiptir þá engu hvort Richard Dawkins hafi einhverja aðra skoðun. Þótt það megi rekja nokkur spakmæli til Biblíunnar, þá gerir það hana ekki að einhverri gátt að skilningi á því hvernig samfélag okkar er sett saman. Þetta er rúmlega 1900 ára gömul skáldsaga sem hefur elst illa. Með góðu mixteipi af frægum senum í seinni tíma bíómyndum má ná miklu betur til barna í grunnskólum en með þessu draugleiðinlega og niðurdrepandi kveri.

Í stuttu máli: Það vill enginn banna börnum að eiga Nýja testamentið, bara það að kverið sé borið í þau á skólatíma. Það vill enginn fíra upp í bálkesti og henda Nýja testamentinu á hann. Svona þegar ég hugsa um þetta, þá ert þú reyndar sá fyrsti hér á blogginu sem færir þann möguleika í mál, spáðu í það! Það er hins vegar fullt af fólki sem vill að börnin séu varin fyrir ásókn kristinna í leik- og grunnskólum, en þar vilja þeir leggja net sín því þar eru bestu miðin fyrir sálnaveiðara Drottins.

Jesús Jósepsson á að hafa sagt að ekki ætti að banna börnunum að koma til hans, en fullmektugir agentar hans hafa eitthvað misskilið þau orð og túlka þau þannig að þeir eigi að draga börnin í bunkum að fótskör hans. Það get ég ekki sætt mig við og á ég mörg skoðanasystkini hvað það varðar.

En takk fyrir innleggið :)