Ég elska ykkur ...

... en ég þarf að slíta sambandinu sem við höfum átt saman. Þetta hefur verið frábært þótt það megi segja að ég hafi gefið meira af mér í svita og tárum. En það skiptir ekki máli, þið hafið alltaf verið til staðar fyrir mig og fyrir það er ég þakklátur. En nú verð ég að halda áfram leið minni og ég vona að þið skiljið það. Við munum sjást á förnum vegi og ég mun heilsa þegar ég á leið hjá, en ég mun ekki staldra við. Ég hef sett markið hærra og þið nægið mér hreinlega ekki lengur. Ég er nokkuð viss um að það líður ekki á löngu uns það kemur einhver nýr til ykkar, enda verður að segjast að það er býsna gestkvæmt hjá ykkur, svo ekki sé meira sagt!

Vegstikur 1, 2 og 3 á Esjunni, ég mun aldrei gleyma ykkur! Vegstika 4 ... þú ert nýja stikan í lífi mínu. Vonandi sjáumst við oft í framtíðinni.

Athugasemdir

[Hörður Helgi Helgason 12.7.2007 kl. 17:40]

Til hamingju, Óli!

Þetta finnst mér vera sannarlega glæsilegur árangur, það verð ég að segja. Ef til vill hrærist ég í sérlegum kyrrsetuhópum, en ekki þekki ég aðra sem geta státað af því að rölta reglulega langleiðina upp á fjallstoppa. Var reyndar einu sinni í bekk með Haraldi jöklafara, en kynntist honum því miður aldrei. Það er eitt að hafa prílað á fjall, en allt annar handleggur að leggja það á sig vikulega eða oftar.

Áfram, áfram!